18 February 2007

الفالنتين و المشاعر المختلطة

و مر عيد الحب
صحيح انا لم اكتب بوست بهذة المناسبة
يمكن لاني لم اكن سعيد لاكتب
او ربما لان الحاسب كان عطلان من يوم الفالنتين و كانة يحتج هو ايضا بطريقته لكوني وحيدا
نعم كنت وحيدا ذلك اليوم
و يبدوا ان عم فالنتين لم يعرف عنواني لكي يزورني
و يقول لي هابي فالنتين يا واد يا كريم


المهم انا مش زعلان منه و لا حاجة بس بقولة يا ريت تشرفني العام القادم
و يا ريت تبعتلي ايميلك او عنوانك عشان ابعتلك هدية و معاها عنواني
لاني خلاص يا عم فالنتين مبقتش قادر
كفاية بقي اني اقول للناس هابي فالنتين و يبقي قلبي وحيد و حزين


عموما اتصل بية م.م صباح يوم الفالنتين الساعة 11 ص تقريبا عشان يقولي هابي فالنتين
لم اكن اتوقع هذا الاتصال منه
و قولتلة انى هتصل بية باليل لانى كنت ف الشارع و مكنتش عارف اتكلم معاه
و باليل كلمتة و قالي انة هيدخل نت .. و فعلا قابلني ع النت بعد شوية
و سالني اذا كنت زعلان .. قولتلة و هزعل لية ؟
يا سيدي عادي ادينا عايشين و خلاص حب اية .. انت مش عاوز علاقتنا تبقى علاقة جنس و خلاص
يعني لما تبقى مثار جنسيا نتقابل و خلاص
بلا حب بلا كلام فارغ
( طبعا لم يكن ذلك حقيقة ما بداخلي )


قالي لا و انة بيحبني جدا و انة مش عاوز حد غيري و انه مش عاوز يقابل حد غيري لانه حاسس اني نصيبة
طبعا كلام جميل ... مش كده ؟ و في مناسبة جميلة كمان
بس هو كلام مجرد كلام


اعتقد لو فيه حد بيحب حد كده
لا يستطيع ان يبعد عنه لمده 3 شهور


قولتلة انا ايضا مش عارف اعرف حد غيرة
و لكني لا استطيع ان اتقبل هذا البعد و عدم الاهتمام
و اشعر انني بالنسباله اخر شيء في حياتة
و انا لا اقبل هذا
و اعطيتة فرصة ليفكر بينة و بين نفسة
ماذا اكون بالنسبة له .. انا فين في حياتة


ووعدني بانة سيفكر جيدا و انه سيقول لي الرد في اقرب لقاء
و لكني لم اعرف اقرب لقاء هذا سيكون بعد كام شهر او كام سنة


الغريب انة اتصل بي يوم الجمعة الساعه 4 مساءا و سالني اين انت ؟ اجبت عليه ف البيت
قال لي انة يريد ان يأتي لزيارتي .. اجبت علية اوكي بس انا لابد ان اخرج الساعه السادسة و اتفقنا ان نتقابل خارج البيت
اعتقدت انة ينوي ان يمضى معي تلك الليلة
لم يفعل هذا سابقا .. و لم اكن ادري ما موقفة الان
و لكني لم اشغل بالي بالتفكير كثيرا
و خرجت و قابلتة و ذهبنا سويا لمكان ما و تحدثنا
و تمشينا قليلا و مكثنا نتحدث
و اخذ يبرر لي ... لا ادري شعرت انه حزين
قال لي ان مشاعرة نحوي ليست رد فعل لمشاعري تجاهه و انه حزن عندما قراء البوست الخاص بذلك الموضوع
و حكي لي عن انه ليس لدية الحرية المطلقة و ان والدية يقيدان حريتة الى حد كبير
و انه لا يريد ان يبعد عني

سالتة هل سينام عندي الليلة ؟؟
اعتذر لانة لا يستطيع ذلك
وعدني الا يغيب عني لمدة طويلة .. وعدني ان يكون حبه لي من اولويات حياتة
جلسنا سويا في مكان ما .... ثم مضينا كا من الي بيتة
لا أدري اشعر انا مشاعري مختلطة
**********************




11 comments:

أحمــــــــدبــــــــــلال said...

مش عارف بصراحة شكل العلاقة بين المثليين بس لو هى شبه العلاقة العادية الطبيعية يبقى اللى أنت فيه ده علاقة منفعة ذاتية و بس
كل واحد منكم أو هو م.م بشكل خاص بيبحث عن المتعة فقط
أى أنك جسد جميل يبحث فيه عن تلبية رغباته فقط
ربما لأنك تعجبه
أو يميل أليك بشكل عاطفى
أو حتى لا يجد غيرك بنفس الشكل

و طبعاً الحالة الوحيد اللى تبعد فيها عن حبيبك لمدة ثلاثة أشهر هى لما تكون مسافر
و حتى و أنت مسافر فى تليفونات ما بينكم
لكن واضح أن العلاقة جسدية فقط

kareem azmy said...

اشكرك يااحمد على مشاركتك
و كمان متشكر على رايك

انا فعلا مشاعري كانت مختلطة
و مش عارف و مش فاهم انا عاوز اية

بس متهيالي دلوقتي انا خلاص فهمت
يمكن بعد ما اتكلمت مع وينكي
وانا اقتنعت بوجهة نظرها
و فعلا لقيت ان كلامها منطقي
عموما كلامها قريب من كلامك مع بعض الاختلافات و الاضافات

اشكرك يا احمد و شكرا ليكي يا وينكي

كريم

Anonymous said...

dear kimo
at first are you sure that you were in love? may be you just wanted to feel love and you put your self in this relation
secind are you sure that he is that bad?i mean probably he had hard condetions make the relations a little hard and strange for him...
first clear your mind and be so honest with yourself do you love do you want his body can you sacrrify for him??????just think and clear your mind to have an end for that to rest your self and him too
a very important thing...stop searching for love and be sad coz you don't have it right now don't be that desprat wait and you'll find what is relly fet for you stop making your self that sad...love like tha cat u run after it to catch it and it run away when you leave it and stop running it'll come under your feet
some one

Amenhotep®© said...

عيد حب سعيد لك و أرجو أن تكون اختياراتك موفقة و تحكم عقلك قبل قلبك.كل سنة و انت طيب .

Anonymous said...

مرحبا لو سمحت لي اعلق على كلامك ولو انه مشاعر خاصه لكن الحقيقه علاقتك بحبيبك ذكرتني بشكل كبير بعلاقه سابقه لي وتقريبا كانت نفس الحكايه لا مريحني ولا مخليني اشوف نصيبي مع حد ثاني

الشخص ده شخصيته ضعيفه ومايستاهلكش انته جيته على الجاهز علاقه هو فيها اللي بياخذوبيدلع وانته اللي بتعطي وبتتنازل ومهما قال انه بيحبك لكن ما دام انته مش حاس بكده يبقى امشي مع احساسك. حبيبي السابق كان نفس الحكايه وكلامه وافعاله متناقضه وكل ما اقول خلاص حاسيبه يرجع ويتحجج ويقول انه بيعمل لي حاجات كتير بس انا اللي مش حاسه فيها!! لكن الامور دي القلب هو الصادق فيها

الفراق صعب لكن صدقني ده احسن حل وما ينفعش حكايه الاتصال المتقطع ده لانه عمرك ما حاتنساه بالطريقه دي وحيفضل محسسك بالذنب واللخبطه والحيره اذا سمحت لي انصحك سيبه وعيش حياتك وحتلاقي شخص يستاهلك ما تبعش نفسك بالرخيص والا الناس حتبيعك ببلاش

good luck

lili

kareem azmy said...

هاااااااااى someone
متشكر على تعليقك يا جميل

و شكرا ليك يا فرعون
امنحوتب

و شكرا يا lili
و اهلا بيكي صديقة جديدة
بجد رايك و نصيحتك في الاعتبار
و عندك حق في كلامك

متشكر ليكم كلكم

كريم

جبهة التهييس الشعبية said...

أنا مش فاهمة حاجة

معلش يا اخ كريم إنت ليه كده؟

أنا قريت البوست بتاع الطبيب النفسي

معلش ده راجل مش كويس

بس فيه دكاترة كتير كويسين وممكن يساعدوك

طيب إنت إيه مشاعرك ناحيتنا؟

قصدي ناحية الستات؟

يعني عمرك ما حاولت تحب بنت خالص؟

وهل مثلا علاقتك بوالدك كانت سيئة أو كنت بتكرهه مثلا؟

مش عارفة

انا خايفة اكون جرحتك

بس انا مش قصدي انا بس عايزة افهم فعلا

أحمــــــــدبــــــــــلال said...

أنا عارف أن مش حقى أرد على حاجة زى دى بس اللى أعرفه أن المثلية مش دايماً من تجارب نفسية سابقة بالعكس بعضهم بيبقى فى أسرة متفهمة و طبيعية بالعكس ممكن يكون أول تجاربه مع بنات
و يجد نفسه يتشد الى نوعه
و نفس الكلام بينطبق على الفتيات برضه
طيب مالفتيات طول عمرهم بيتكلموا مابينهم و بين بعض عن الجنس و بيغيروا فى وجود بعض
و بيرتبطوا بأصحابهم البنات أوى بس مش معنى كده أنهم بيتحولوا مثليات

الرد ده لجبهة التهييس الشعبية
يعنى الموضوع مش على طول نفسى

خواطر مثليه said...

انشاء الله السنه الجايه ياكريم يكون الفلانتين احلي من السنه دي و تكون مع حبيبك و تقضوا اوقات لطيفه سوا
اهم حاجه ياكريم انك ماتديش قلبك الا للي يستحقه لان مشاعرك غاليه و لازم تديها لحد غالي اوي عليك
تحياتي ليك عزيزي

Anonymous said...

ازيك ياكرم
انا كنت بقراء دلوقتى فى المدونة بتعتك وعجبتنى اوى ولفت نظرى كليب قلب وراح
وغريب انى لاول مرة اسمع الاغنية دية.
رغم اعجابى بلكليب ورغم انى حسيته اوووى اوووى وفتح جوايا جرح قديم
ورغم انى كتبت تعليق فيها لكن مسحته فى اخر لحظة.
عارف لية لانى اكتفيت حزن على انسانة جاحدة خاينة مقدرتش تقدر حبى ليها .
وعجبنى كمان بوست الفالنتين وعايزة اقولك راى بعد اذنك فى حبيبك يا كريم انت بتحب من لايستحق حبك وحنانك .
انسان الواضح ان قلبه جامد ومش مقدر ولا مهتم بقيمة الحب
والحب عندنا احنا المثلين اغلى شىء فى الدنيا هو الامان والدفىء والحضن الحنين
البديل عن الية اتحرمنا منه لاننا مثلين مختلفين عن باقى البشر فى ميولنا ومشاعرنا
وياريت ياكريم تفكر 1000 مرة قبل ما ترجع له لانه لو جرحك تانى عمرك ما حتقدر تثق بعد كدة فى اى حد
ويمكن تضيع من اديك شخص بيحبك من قلبه كلامى دة عن تجربة شخصية بس حبيت اقولهولك لانك معايا بنفس المركب مركب المثلين بلوطن العربى يعنى احنا بس الية نقدر نفهم ونحس ببعض
وفى نهاية كلامى
ياريت تتقبلنى صديقة جديدة ليك ولمدونتك
اسفة انى نسيت اعرفك على نفسى انا نور مثلية من مصر
والحقيقة عندى مدونتين لكن للاسف بمر الفترة دية بنوع من الكسل ومش بكتب كتير
يادوب كتبت مقال او اتنين فى مدونة منهم رغم حبى وعشقى للكتابة لكنى مش قادرة انظم تفكيرى

وسلام سلام
دة عنوان لمقال هزلى ليا فى مدونتى

http://wazan2007.jeeran.com/archive/2007/1/145468.html

kareem azmy said...

اهلا بيك يا نور
اهلا بيك صديقا غاليا
و متشكر على تعليقك الجميل و طبعا هزور مدونتك

كريم

Post a Comment

اشكرك على إهتمامك وتعليقك .. والإختلاف في وجهات النظر شئ مقبولة ما دام بشكل محترم ومتحضر .. واعلم أن تعليقك يعبر عنك وعن شخصيتك .. فكل إناء بما فيه ينضح .