19 October 2007

الخريف و مشاعرنا الانسانية

انتهى فصل الصيف و بدأ فصل الخريف , اشعر بحالة من الاكتئاب , لا ادري إذا كنت وحدي المصاب بها أم الكثير من الناس , هل لتغير المناخ سبب في هذا الاكتئاب ؟ هل تتساقط أوراق الأشجار و معها الكثير من المشاعر لدينا ؟ الكثير من المشاعر التي كانت المزدهرة في الفصل السابق سواء كانت مشاعر حب لصديق أو حبيب ؟ هل يدب الخريف أيضا في مشاعرنا و علاقتنا الإنسانية مثلما يحدث في الأشجار و أوراقها ؟ لا ادري

و لكني اشعر بان الكثيرون ممن أحببتهم ابتعدوا عني , و لا ادري السبب , و هذا يصيبني بالحزن

الأخت نونا لا ادري ما بها , حاولت الاتصال بها مرارا في العيد و أرسلت لها رسائل تهنئة كثيرة و لكنها لا تجيب على الهاتف و لا ادري ما السبب في هذا لم يحدث بيننا اى اختلاف في الآراء , أخر مرة حدثتني كان في أخر رمضان تقريبا و استمرت المكالمة لمده طويلة , اشعر بالقلق عليها , لا ادري هل أخطأت في شيء أم أن هناك شيء يبعدك عني و يمنعك من الرد على اتصالي بك ؟

الأخ جو أيضا ابتعد عنى طوال شهر رمضان , لا ادري إن كان السبب هو رفضي لاعطاءه بيانات شخصية عنى هو السبب , أم أنها مسابقة رمضان أم ماذا ؟ الم نتفق أيضا أن نكون إخوة و سعدت جدا به , و أحببته كثيرا , لكنه الآن يقول لي انه مشغول و إنني لم اعد في حاجه إليه , هل العلاقات الانسانية تحدد بتوقيت تبدأ به و تنتهي به , و أخيرا قال لي أنني إنسان متكبر , لأنني كتبت في بوست سابق أن مدونتي ليست عيادة نفسية للآخرين

أنا مش إنسان متكبر زي ما انت قولت و لا نفسي هي محور اهتمامي

أنا لما كتبت الكلام ده كنت موجهه للقراء الجدد و اللي ممكن مش قروا أي حاجه عني و بيحاولوا يكلموني بدون معرفة اى خلفيات عني , و طبعا الموضوع مش موضوع شخص أو اتنين , العدد كبير بالنسبة لقدرتي كانسان على السماع للناس و كمان نوعية المشاكل اللي فعلا مش هقدر أساعدهم فيها بشيء

يعني لما حد يكلمك و يطلب منك انك تساعده و تنصحه انه مش يبقى مثيلي و ازاي يبطل الشيء ده , طيب أقوله إيه و أنا شايف انى مش اخترت اكون كده

لما حد يبقى بايسكشوال يكلمك و يقولك انه بيحب ينام مع البنات و الولاد و مش عاوز ينام مع ولاد تاني ... اقوله إيه ؟

لما حد يكلمك عشان هو مثيلي و ف نفس الوقت مش قادر يبعد عن الموضوع و يفضل يتكلم معاك و يقنعك بالحجج الدينية إن ده شيء حرام و المفروض انى معملش كده تاني ..على الرغم انه هو بيعمل كده .. اقوله ايه ؟

لما حد يكلمك عشان مش عارف لما بينام مع صحبه مش عارف الوضع الفلاني مش بيريحه .. اقوله ايه ؟

لما حد يكلمك علشان هو بيدور على حد و انه من خلال قراءته ف المدونة حس انى مناسب له و انى الشخص اللى هو بيدور عليه , و انه معجب بيه و انى لازم اقابله , و اننا مش لازم نضيع وقت في اننا نتكلم علشان انا اعرفه , يعني كفايه قوي انه عرفني .. اقول لشخص زي ده ايه ؟

بالتأكيد فيه ناس تانية فاهمة و عندها مشاكل و الغريبة ان كل اللى بيحس انى بكتب عنه بيقرا كل الموضوعات و بيفهم طبعا مين كريم , بيكلمني و بيتناقش معاية و فعلا لو عنده موقف او مشكلة قريبة من مشاكلي بيسالنى و بنصحه و الحوار مع الاصدقاء دول بيبقى ممتع جدا و ببقي سعيد جدا بمعرفتهم

بجد انا عمري ما كنت انسان اناني و لا نفسي هي محور الكون زي ما حضرتك قولت


الصديق متوحد او عمرو اشعر ايضا انه ابتعد عني , يقول انه مشغول و ان مهامه الوظيفية زادت , و لكن هل هذا يمنع مجرد اتصال لا يستغرق بضع دقائق , لا ادري فيما اخطأت , او ما هو سبب البعاد ؟ هل هناك علاقة بين بعاده و بين دخول توتي حياتي ؟


و كذالك ( ا.ل ) الذي لم يوافق على الكلام الذي نشرته بخصوص انسحابه من حياتي , حيث يقول انه لم ينسحب و ان مشاعره نحوي لم تتغير , و انه حزين بسبب كلامي , اشعر بالحزن انا ايضا , و لكني اشعر ان قراري كان صائب فهو ليس مثيلي و ابتعد عنى ف المكان و حتى ف المشاعر , عاد مرتين لبيته لم يفكر في لقائي و عندما واجهته قال لي انه كان مشغول و لم يملك الوقت و انه كان لديه مشاكل , قلت له انه سوف يقابل فتاة يحبها و يتزوجها و ينساني , قال لي لا تقلق لن اتزوج ابدا , لا ادري ماذا افعل

كل تلك الأمور أدخلتني في حالة من الحزن و الاكتئاب , تلك الحالة التي لم أستطيع التخلص منها عندما قابلت توتي في تالت يوم العيد عندما جاء لزيارتي , طبعا شعر هو بان هناك شيء ما أخفيه عنه , لم أستطيع البوح له بكل تلك الأمور , كعادتي لا أستطيع الحديث عن مشاكلي حينما تحدث , لا ادري ماذا كان شعوره وقتها , بالتأكيد تضايق , و خصوصا حينما طلب منى الموبيل ليقراء الرسائل المرسلة لي فرفضت , لا ادري لماذا رفضت ليس هناك ما اخفيه و لكني رفضت وقتها , أكيد غضب من موقفي هذا , و اعتقد انه الآن يحاول البعاد عني أيضا

اشعر بحزن رهيب , اشعر أنني أريد أن أقابل ( ا.ل ) اريد ان اتكلم معه وجها لوجه , دائما كان يفهمني و يشعر بما داخلي , كم احتاج إلى إنسان صادق يرشدني و يوجهني أو ينصحني , اشعر بالحزن و المرارة داخلي


إن كنت أخطأت في حقكم أرجوكم سامحوني , لا تبتعدوا عني , فانا استمد قوتي من حبكم لي , فانا اضعف بكثير مما قد تتخيلون , لا اخجل من هذا الاعتراف , نعم اعترف أنى ضعيف بدون حب الآخرين , أتمني أن تعاتبوني أن تقولي لي فيما أخطأت , و لكن لا تبتعدوا عني

و اشكر باقي الأصدقاء الذين يقفون بجواري حاليا ... الصديق رامي من الأردن , الأخت الغالية داليا من القاهرة , رامي من الإسكندرية , الغالية هارت بيت , الغالية أجندا حمرا , الصديقة ليدي






21 comments:

kareem azmy said...

تحديث :: اتصلت نونا بي اليوم و شرحت لي الظروف انها كانت و مازالت مريضة في السرير لا تقوي على فعل شىء , كان صوتها ضعيف جدا , حزنت جدا لهذا حاولت جاهدا الا تري دموعي في صوتي و انا احدثها و اعتذرت لي انها لم تكن تقوي على الرد على الاتصالات و اعتذرت لها لاعتقادي انها بعدت عني , اختي الغالية اتمني لك الشفاء ,او اتمني ان ازورك لكني مقدر الظروف , و اتمني لكي الشفاء حتى اقابلك , لاني حقا افتقدك جدا

AMRO .O. ABDELHALIM said...

العزيز كريم
الخريف فصل فى غاية الروعة، ولا اعتقد انه قد يؤثر على المشاعر سلبا، بل هو وقت الحصاد لمشاعرنا التى ظللنا نرعاها ونسقيها باعصابنا ودمائنا طوال الصيف، الخريف هو فصل الحب
لا اريدك ان تغضب، ولكنى اجد نفسى متفقا مع جو حول طريقة الاعلان الذى اوردته عن عدم قدرتك على مساعدة الذين تعشموا فيك، لطالما قلت لك انك تمثل حالة يتقصدها كل من يقراك، ويحاول التمثل بها، من قال انك اوبرا وينفرى؟ انت كريم الذى يظن كل من يحبه انه قديجد ملاذا امنا معه
بالنسبة لى، انا يصديقى مازلت اعتز بصداقتك،والحقيقة اظن انها من افضل ماحدث لى فى هذا العالم، كل ما فى الامر انى مضطر دائما الى متابعة والسفر الى الموانى البرية والبحرية ، انا فى سفر طوال الوقت،اصبحت كبحار لايجد راحة ولا عزاء وعندما اذهب الى مقاهى الانترنت التى تفتقر الى الخصوصية تماما، اجد نفسى عاجزا حتى عن الدخول الى مدونتى
لطالما قلت لك انى ساسعد دائما بسعادتك
، اعلم انك الان سعيد جدا لوجود توتى فى حياتك، وانا سعيد ايضا لسعادتك،انا مدرك لكونى لم اخلق للاستقرار، اتمنى ذلك لاتمكن من البقاء قربك وكل الاصدقاء
انا سعيد حقا ان صديقتنا نونا تتماثل للشفاء، وبالمناسبة انا لازلت احتفظ لها بالفانوس الذى اهديته لها، بانتظار ان تاتى لاستلامه ان لم اكن موجودا فساوصى من اثق به ليسلمه لها او لك
انا سعيد بانك محاط بهذه المجموعة الرائعة من الاصدقاء واخص منهم بالتحية كل من هارت بيت واجندا حمرا وسعيد باشتراكنا فى هذه العلاقة الانسانية الرائعة، اتمنى حقا ان اراهما معك قريبا
ساحكى لك على المسنجر المزيد
واسباب قلة التواصل
تحياتى وامنياتى لك بالتوفيق والسعادة

أحمــــــــدبــــــــــلال said...

بالطبع الخريف يثير فينا مشاعر الشجن و الحزن و الألم
لا يوجد ما يسمى بتساقط للمشاعر كما يحدث لأوراق الشجر فى الخريف
ربما تفتر علاقتنا بالآخرين نتيجة جمودها على حال ثابت واحد لا يتغير
و من الطبيعى ان تشعر بالحزن لأحساسك بأبتعاد الاخرين عنك
نونا كما قلت الآن أنها أجابت أتصالك و مازالت مريضة
ربما جو قد أبتعد عنك بسبب رفضك عرض معلومات شخصية عنك له فكما أرى لا أستطيع أن اصادق شخص بلا معرفتى حتى لأسمه و سنه و الحقيقى
بالرغم من أنى فعلتها من قبل
و لكنك لست متكبراً فالمدونة ليست باب عزيزى القارئ و لا طبيب القلوب فى مجلة تافهة بل هى نقل لمشاعرك و لمواقف معينة فى حياتك قد تأثرت بها و أثرت بها فلا يوجد معنى لأن تعرض مشاكل الاخرين ألا لو كانت مشاكل قد تركت لديك أنطباعاً ما بعيداً عن شكل الرسائل المرسلة أليك
لا أعرف شيئاً عن عمرو و لكن بالطبع أكيد له أسبابه و ليس كل شئ يمكن قوله علناً ربما لديه مشاكل لا يستطيع الاعلان عنها
أ.ل كما قلت من قبل ربما ما تراه لا يمنع اللقاء بينكما يكون أكبر أو أضخم مما تصورته أنت و منعه من مقابلتك فعلاً
و كما قلت من قبل لا أحد يعرف مشاكل الآخرين
أو كما يقول المثل العربى
ماحك جلدك مثل ظفرك
و أذا كان توتى يحبك فعلاً سيقدر أختلاف طباعك فى تلك الفترة
أما أ.ل ربما أراد مقابلتك فعلاً و لم تشاء الظروف أن تتلاقوا
و ربما أحتاج لقائك أكثر مما تصورت أنت طالما قلت أنه يفهمك بسهولة و يقرأ أفكارك

لا أحد يستطيع المعيشة بدون دفء مشاعر الآخرين من حوله

Anonymous said...

على فكره انا اللى كنت كلمتك على النت شكرا جزيلا على مشاعرك الرقيقه واهتمامك بالمساعده حقيقي انت فعلا فى منتهى اللإجابيه وأثبت ده لما كتبت عنى بأسلوبك اللذيذ ده عموما ربنا يسامحك ومش معنى انى مثلا سألتك فى شئ يبقي خلاص انا عايز حد يفكرلى زى ما انت بتقول انما انت اسلوبك مش حلو خالص على فكره وإضايقت عشان انت مش شتيف غير مشاكلك وبس وبعدين من ناحيه الدين انت اتخلقت عشان ايه اساسا سبيبين اولهم عباده الله وطاعته وثانيا تعمير الارض مقدرش احاسبك عشان انا مش ممتلك سلطه زى دى بس فى النهايه بقولك ربنا يسامحك ويهديك وتحسن اسلوبك عده مع الناس عشان تعرف تعيش

Anonymous said...

صديقي كريم
يبدو الحزن واضحا في كلماتك ولكن عندما تشعر ان الجميع ابتعد عنك الا تعتقد ان السبب هو ربما تصرفك معهم بغير ما هم يتوقعون يعني عندك شي خطا بطريقة تعاملك مع الاصدقاء شو هي مش عارف بس فيك تعيد النظر بينك وبين نفسك اكيد لح تعرف يمكن المشكلة انو احدنا بيفكر انو هو الوحيد اللي عنده مشاكل بالكون وغيره لازم يستوعبه دايما ويفهمه هيدي وجهة نظر لا اكتر
بكل الحالات بتمنى لك كل خير
فادي.ف

Anonymous said...

yesstofriends@hotmail.com
كلماتك مؤثرة بس لما الكل من للاصدقاء بيبتعدوا عنك يعني لازم تراجع طريقة تعاملك مع الاخرين بتمنى لك التوفيق

Anonymous said...

السلام عليكم
انا دخلت دلوقتى على مدونتك وقريت موضوعك الاخير
تعرف انا من يومنين كنت عايزة اسيبلك اوف لين اقولك انى حاسة انى فقدت كل حاجة الايام الية فاتت الحب الامان الصداقة بس الاكتر بقة انى فقدت جدددا الثقة فى نفسى
والسبب بعد كتير من اصحابى الية كانوا هما الية بيتقربوا منى
ومش عارفة لية كلهم كدة وفجاءة بقوا مشغولين
والسؤال الية تعبنى اوووى هو انا ما ستحقش صديق حقيقى فى حياتى
طيب اية الغلط الية فيا
السؤال ده عامل زى حاجة بتجرحنى
وبتدخلنى غصب عنى فى حالة اكتئاب
انا اسفة بكلامى ده بزود همك
بس موضوعك مس حاجة جويا
لو مش عارف ايميلى انا نور يا كريم
بتمنى ليك ولنفسى اننا نكون اقوى من كدة ونخرج نفسنا من الحالة دية
والله انا بحسد نونة وجون على صدقتك دية
وكنت بتمنى اكون زيهم
للاسف انا كل اصحابى عاديين معرفش حد مثلى علشان كدة كنت سعيدة اوووى لما اتعرفت عليك
حاسة انى اتعرفت على حد بيتكلم نفس لغتى فى مكان كل الناس بتتكلم فيه لغة غريبة
يارب تخرج من حالة الاكتائب دية وتتبدل بفرحة
رغم انى مش بسمع تامر حسنى اووى بس انهاردة سمعت اغنية له بتعبر عن الية انا فية
اغنية الوحدة
حاسة انه حالى
وباين ده حال ناس كتير اوووى فى الزمن ده

kareem azmy said...

اوكي يا عمرو في انتظار مقابلتك على الشات

****
متشكر يا احمد على تعليقك الجميل
مين عارف كل شىء ممكن
المهم انه مش يبعد عني و اقابله

*****

الصديق المجهول الاول
لم اكتب كلامي عنك و لا عن شخص بعينه
كل التجارب التى تناولتها هنا لا اتذكر اصحابها .. و لكن كل ما اتذكره انها مشكلات تكررت مع اشخاص كثيرين

اما موضوع انى اسلوبي مش حلو فعادي انا لست كاتب و لا شاعر و لا اعمل في جريدة هذه يومياتي و اكتب بها كيفما يحلو لي

*******

فادي . ف
عموما متشكر على زيارتك

*******
yestofriends
مين قال ان كل الاصدقاء بيبعدوا ؟؟

*******
الغالية نور
مين قال كده انك مش غالية عليه و انك مش قريبة مني
عموما يا ستي انا اسف انى مقصر معاكي
و ان شاء الله نكون اقرب من بعض
انتي بجد عزيزة عليه بجد يا نور
الله بقى احنا مش كنا مظبطين و كنا هنبقى نسايب يا ستي ... انتي رجعتي ف كلامك و لا ايه (;؟؟؟

تحياتي
كريم عزمي

دنيا said...

كريم معلش ممكن يكون كلامى مش لية اى علاقة بالموضوع الى انت كاتبة بس انا هقلة لانى مش عارفة اكتبة فى اى موضوع ليك انا قريت كام موضوع والى فهمتة من كلامك انك مثلى وبس الصراحة والى عجبنى جداااااااااا فيك انك عندك امل انك تبطل وانك عايز تتغير وبتحاول ومش بتيأس بص يا كريم انا اكيد كلامى دة كتير غيرى قالولك علية بس معلش اعتبرة نوع من انواع انى بايدك انك تستمر فى محاولة التخلص وانك مش تيأس ابدا
والحل او من رائ انة ممكن يساعدك انك تلجأ لربنا بنية صافية لانك واضح انك فيك من جواك بذرة ايمان وصفاء ودى الى مخلياك عايز تتغير ادعى ربنا فى جوف الليل انة يتوب عليك اتصدق كتير يعنى الخلاصة خليك دايما قريب من ربنا اطلب من العون
واخر كلامى يا كريم اعرف ان ربنا بيحبك لانة لو مش بيحبك صدقنى ما كنتش هتحاول تغير نفسك ربنا لما بيحب حد بيخلية دايما يحسن نفسة بيحط فى سكتة حاجات تخلية يفكر انة يتوب ويجدد توبتة
معلش انا طولت عليك قوى بس صدقنى انا بتعاطف معاك جداااااا وحاسة بمعانتك معاناة الانسان الى عايز يرضى ربة ومايكنش مختلف عن الى حوالية ومااملكش ليك غير انى ادعيلك انت وكل الى زيك سواء بنات او ولاد

Unknown said...

بسم الله الرحمن الرحيم
عزيزي كريم
وضعك وحالتك بتمر مع الاكثرية
وخصوصا اصحاب المشاعر المرهفة واصحاب المشاعر الحساسة
وانا شخصيا عبرت بحالتك وما زلت اعبر
وتعلمت شيء مهم من دي التجربة
"الي نساك انساة,والي يبيك اهواة"
ومتل ما بقول المثل الشعبي
"ذاكر الي نسيني وناسي الي ذكرني"
ولا تكرهون شيء عساة خيراً لكم
واتمنالك كل الخير وربنا يصبرك ويعوضك.

Anonymous said...

وليه مش عارف من بعد ما انا كلمتك انت عملت البوست على طول عموما تقصدني تقصد غيري بس انا قصدى مش الاسلوب انك تبقي شاعر او كاتب انا قصدى انه كان فيه اسلوب احسن من كده وبعدين حريتك الشخصيه فى مدوناتك ده من حقك وبتمنى ليك التوفيق ديما وعموما انا مشترف جدا بمعرفتك فى أى حال من الأحوال يا كريم

المجهول الأول : احمد

أحمد الشرقاوي said...

اكتئاب الشتاء و الخريف حالة معروفة و شائعة بين الناس
صلاح جاهين كان من اشهر الناس اللي بيجيلها اكتئاب الشتاء
لكن مش تزعل نفسك، لو انت زهقت من الدنيا روّح،لو لسه مش زهقت ادخل بقلب جامد، عندك كتير لسه مش شفته
حاول تغير خريطة يومك لفترة و هتبقى احسن

zain said...

اهلا انا زين من جدة / السعودية انا من اشد المعجبين بيك وبمدونتك الجميلة وخاصة مواضيع التي بتسلط الضوع فيها على حياة المثلية ومشاعرهم الي انا كنت بعاني قبل مااقرأ ليك وانا مثلي عايش بالسعودية مدينة جدة واتمنى اننا نكون اصدقاء ty

catroz said...

الخريف .. فصل جميييييييييييييل جدا
مش هو الوقت المناسب للاكتئاب
لااء .. احنا اللى بنخليه مناسب للاكتئاب
و انا اولكم يعنى

انا تقريبا بقالى كتيييييييييير مدخلتش هما

معلشى بقى ..ياارب تكون بخيير ..:)

Anonymous said...

هي ممكن حالة الجو وتغيير الفصول من العوامل الطبيعيه بس الانسان هو الانسان المفروض مايتغيرش هو اللي يأثر في اللي حواليه ومايخليش التغيير ده يتغلب عليه وعلى طبيعته هو انا عن نفسي علاقاتي كلها بتنشط وبتجدد وبتقوى اكتر في الخريف والشتا اكتر فصول السنه بالنسبه لي حيويه وطاقه ونشاط اما بالنسبه ليك يا كريم يمكن ماتكونش مغرور او متكبر او بتحب نفسك لدرجة الانانيه بس ممكن تكون بتعامل بعض الناس وانا بقول بعض الناس مش كلهم يمكن انا منهم بحس انك بتعاملهم من خلال ستاره بينك وبينهم جايز ده حرص شديد منك وده معاك حق اكيد بس المثل بيقول صوابعك مش زي بعضها وارجع اقول لك الختام المشهور (ربنا ولا تحملنا ما لا طاقة لنا به) .

Heart Beat said...

صديقي العزيز كريم

اشكرك على وضع اسمي من بين اصدقائك و اتمنى ان تدوم صداقتنا هذه للابد

اتمنى ان تزول حالة الاكتئاب التي اصابتك

و ان تكون فقط بسبب تغيير المناخ

اعلم جيدا انك تستطيع ان تتخطاها عما قريب

Noor - نور said...

عزيزي كريم
اشعر بالاكتاب كدلك لانك لم تعتبرني صديق وتلجأ لمحاورتي ومحاولة قول ما بدا لك مما تشعر

ولكن
اتمنى لك دوام التوفيق لك ولجميع الاصدقاء

صديقك نور

Anonymous said...

ااااااااااااه ياكريم ايها الرائع ابكيتنى كثيرا وجعت قلبى شعرت بالخوف من هذا الواقع المرير الذى تعيشه الأنسانيه يبدو يا كريم اننا نحيا فى زمن النسيان هذا الزمان الذى طال كثيرا لذالك يجب علينا ان نتحلى بالصبر وان نكون اقوياء ونقف بصلابه فى مواجهة هذا الطوفان من الأحزان اذا سلمنا انفسنا الى الحزن سوف يقضى علينا اشعر بدموعك الساخنه التى تتساقط على وجنتيك عارف انا لما حكيتلك على قصتى انا وشادى انت كنت اول واحد يحترم الكلام ويشعر بمدى الحزن الذى يملئ صدرى ويحيط بي من كل الجوانب قررت ياكريم انى اقفل على قلبى بالمفتاح مفتاح الأخلاص واعيش طوال حياتى وطوال ايامي القليله القادمه امشي على ثري ذكريات الماضى التى بالنسبة لى حاضر ومستقبل اقولك حاجه شادى علمنى ان القلب مايسعش اتنين ياكريم انا حاسس بيك وبقلبك اشعر بدقاته التى تصرخ من الم الفرااق لأن قلبى يصرخ مثل قلبك وسيظل يصرخ الى اخر نقطة دم فيه سيظل ينادى على الحبيب الغائب اوعى تفتكر انى مكتأب لألألأ انا سعيد بحزنى انا فرحان بشعورى بأنى قريبا سوف الحق بالغالى انا سعيد بالدموع التى يذرفها القلب قبل العين على فراق الغالى ......... علمنى ان النهار مهما طال لابد من ظلام اليل وان العمر مهما طال لابد من دخول القبر انا عارف انى بعدت عن موضوعك بس سامحنى لا استطيع ان اتكلم غير عن شادى انا بشعر بيالذنب لما لسانى بينطق اسم غير اسمه بس هؤلك كلام هتلاقيه مناقض لكلامى وللحاله الى انا عايشها وحابب انى اعيش فيها ومش هخرج منها الا عند لقاء الحبيب الغائب هؤلك اوعى تستسلم لحالة الحزن والكائبه وتأقلم مع هاى الدنى التى غلفت نفسها بغلاف سميك من ورق النسيان واعمل نفسك ناسي وعيش كل لحظه كأنها اخر لحظه فى حياتك ومدام كده كده عايش عيش احسن حاجه فى حياتك واوعى تبطل حب اوعى تترك الأحزان تسلب من قلبك نبضه وتعطيك بدلا منه دموووووووووع وااااهات اوعى تسبها تعمل فيك زى ماعملت فيه اوعى ياكريم . قوووووم حبيبي قوم وانفض تراب الأحزان من على قلبك الرقيق قلبك مايستحملش الألم ده كله قوم حبيبي وامسح دموعك من عنيك واوعى تسمح لحد انه يؤلمك خليك دايما اقوى من الوجع قوم وفجر لنفسك طريق فى بحر النسيان وعدى بسرعه الى شاطئ الحب . شاطئ الحب ذو التراب الأصفر الناعم تراب الأخلاص والتسامح وأنسي الألم ." وخلى بالك من نفسك "اه نسيت اقولك اوعى تنسي تحب نفسك علشان مش عيب ان الأنسان يحب نفسه علشان انت لو محبتش نفسك الناس مش هتحبك اصل الناس بتنظر ليك حسب نظرتك لنفسك كريم انت قوى علشان انت انسان وعلشان كمان انت عندك قلب شغال ........ ارجوك ماتنسانيش . لو عاوزنى اكون جنبك وتكون جنبى فى شوية الأيام الى فاضله انا تحت امرك بس يارب بئه انت توافق انى اكون صديقك رغم فرق السن يعنى اصلى عندى 19ده رقم تليفونى0100000000 هستنى منك تليفون قريب انا ميدو قبطان سفينة الأحزان فى بحر الهوى

============
اسف يا ميدو انا شلت رقم موبيلك حفاظا عليك و ساحتفظ به لنفسي فقط .. تحياتي كريم

Anonymous said...

تحياتي لك صديقي العزيز كريم

البوست يحمل الكثير من المشاعر الانسانيه
صدقني ياكريم وقت الواحد مش ملكه و ساعات بنلاقي نفسنا مش ملاحقين نعمل حاجه بس بنحاول نتواصل مع اصدقاءنا اليل بنحبهم و صدقني برضه ساعات بيكونوا علي بالنا و ممكن مانكونش بنتكلم معاهم علي طول و بحاول التمس العذر للاصدقاء اللي بيتأخروا في التواصل و اقول الغايب حجته معاه

اشكرك ياكرمي انك معتبرني من اصدقاءك المقربين و يارب يجوم التواصل و احب احييك و احيي كل الاصدقاء الاعزاء اللي مروا في مدونتك و دايما في تواصل معايا

ربنا يوفقك و يسعدك ياكريم
مودتي و احترامي لك صديقي العزيز

Anonymous said...

يا كركر انت محظوظ لانك عندك اصدقاء بيتواجدوا ويغيبوا... امال اللى مفتقدين وجود الصداقة فى حياتهم يعملوا ايه والحياة كلها عندهم خريف مش ربيع ربنا يرجع لك غايبينك

رباب

Anonymous said...

3azizy Kareem,

Ezayak lesa fat7a el net mn sa3et ama etkalmna akher marra asfa le gheyabi el wa2t el taweel da bs fe3lan a7das kteer ama ashofak akeed 7a7kelak ya rab tekon kowayes e7sasak be el we7da be el shakl da sa3b awi bas ana 3ayza 2a2olak 7aga a7yanan lama el wa7ed bysaytar 3aleeh e7sas el we7da momkn yekon feh nas 7awaleeh we 7agat kteer bs e7saso mekhaleeh mayshofhash ! ed3y rabena we inshalah kheer ana 3an nafsy ba7ebak gedan we mabrook 3al maktaba 2o3zorni el fatra de 3la ghyabi mashy dear ? khali balak mn nafsak we salami lek we kol 7abaybak ashofak 3ala kheer ,

Lady :-)

Post a Comment

اشكرك على إهتمامك وتعليقك .. والإختلاف في وجهات النظر شئ مقبولة ما دام بشكل محترم ومتحضر .. واعلم أن تعليقك يعبر عنك وعن شخصيتك .. فكل إناء بما فيه ينضح .