01 September 2007

مسابقة رمضان على يوميات كريم

أصدقائي الأعزاء و قراء مدونتي الكرام .. بمناسبة شهر رمضان الكريم يسعدني ان اقدم لكم مسابقة رمضان علي يوميات كريم

طبعا الفكرة في الأول كانت مجرد دعابة أو هزار أثناء كلامي مع احد الأصدقاء و بعدين قولت طيب ليه لاء , ليه مش يكون فيه مسابقة على المدونة يعني بما أنى مش بشوف تليفزيون خالص و فيه ناس كتير كده , كمان اهو يبقى نوع من التواصل الجميل بين الناس , لذلك قررنا أن نقيم هنا مسابقة رمضانية

كلنا عارفين مسابقة يعنى جوايز .. و دي كانت مشكلة .. يعنى طبعا أنا مرتبي يا دوب بيقضيني بالعافية .. و حكاية إن الجايزة تكون معنوية دي مش ولابد قوي و مش مشجعة كمان .. طيب اعمل إيه ؟

المهم .. عرضت الفكرة على صديق , لقيته رحب قوي بالفكرة و عجبته و تشجع و قال انه هيكون راعي المسابقة , هتسألوا مين هو ؟ طبعا يا جماعة هو مش نجيب ساويرس و لا حاجه , دماغكم مش يروح لبعيد , هو صديق بلوجرز عادي جدا انسان طيب قوي , و مش مليونير و لا حاجه عشان بس محدش يطمع فيه بعدين , بس هو غني بقلبه و طيبته و اخلاقه و حب يشارك في المسابقة من الناحية المادية , عموما في أخر رمضان هقولكم هو مين .... و صديقنا الراعي الوحيد حتى الآن قال انه هيساهم ب 500 جنية مصري طبعا بشكره بالنيابة عن الفائزين المنتظرين

إنما طبعا لو حد عاوز يشارك في رعاية المسابقة فأهلا و سهلا بكل الرعاة و باب المشاركة ما زال مفتوح

طيب لسه فيه مشكلة كمان .. و هي الجايزة هتكون إيه ؟ و كمان هتوصل للفائز ازاي ؟ طبعا ده اخد مننا وقت في التفكير . و كمان كيفية توصيل الجايزة كان له تأثير كبير في اختيار شكل الجايزة .. يعنى مثلا صعب اننا نطلب من الناس انها تدينا عناونها عشان نبعت الجايزة بالبريد و خصوصا لو كانوا مثيليين .. كمان موضوع انى اقابل حد عشان اسلمه الجايزة شخصيا بردة صعب .. يعنى احتياطات امنية .. طيب و بعدين نعمل ايه ؟

كانت الطريقة الوحيدة اللي ممكن نوصل بيها الجايزة هي النت .. طيب جايزة ايه بقا اللى ممكن نبعتها ع النت ؟؟؟ .. فكرت كتير و بعدين مش لقيت إلا إن الجايزة تكون كروت شحن للموبيل .. يعنى هيبقى سهل انى أبعت رقم شحن الكارت للفائز على الايميل الخاص بيه

طيب تفاصيل المسابقة بقى .. المسابقة هتكون اسبوعية .. كل اسبوع هينزل بوست فيه 4 أسئلة .. يعنى عشان مش نتعب الناس و كمان الأسئلة هتكون بسيطة .. و حضراتكم هتبعتوا الإجابات على ايميل خاص بالمسابقة .. كل الحاجات اللى هتكتبها في الايميل هي اسمك الأول بس و ممكن كمان اسم حركي او نيك نيم يعني و إجابة الأسئلة و نوع موبيلك ( فودافون / موبينيل / اتصالات ) .. و في نهاية الأسبوع هتظهر النتيجة و هيكون فيه 3 فائزين .. الاول كارت شحن قيمة 50 جنية .. الثاني كارت شحن قيمة 25 .. الثالث كارت شحن قيمة 25

طبعا لو تكرم احد الأشخاص في المشاركة في رعاية المسابقة قيمة الكروت هتزيد أو عدد الفائزين هايزيد .. عموما أنا بتكلم دلوقتي عن الموارد المتاحة حاليا

المسابقة ليست حكر على المدونين فقط , المسابقة مفتوحة لكل الناس بس المهم يكون لديك ايميل خاص بيك , أما أصدقائي و قراء مدونتي المقيمين خارج مصر , فيسعدني مشاركتهم أيضا , صحيح الجائزة لن تكون صالحة للاستخدام لديهم و لكن من السهل أن يهدوها لأحد الأصدقاء لديهم أو الأقارب المقيمين داخل مصر

أتمني لكم رمضان سعيدا , يملئه الحب و الخير و الإيمان , و أتمنى لكم الفوز في المسابقة المتواضعة هنا في مدونتي , و اشكر راعي المسابقة و ادعوا له بالخير و السعادة



15 comments:

AMRO .O. ABDELHALIM said...

هاااى صديقى
فكرة ممتازة ، انا من اول المشجعين والمويدين، دائما انت صاحب مبادرات مدهشة، ربنا يوفقك وتكتمل المسابقة بنجاح
رمضان كريم وتحياتى

أحمد الشرقاوي said...

الفكرة جديدة
رغم ان رمضان تقيل على قلبي و معدتي
باهنيك على الفكرة

Anonymous said...

بسم الله الرحمن الرحيم
رمضان كريم
وكل عام وانت بالف خير
عزيزي كريم بجد احساسي بمجلة
انت مبدع ومميز وفنان.
ببساطة لا كلام يعبر عن مدى اعجابي بك وبشخصيتك الاكتر من روئعة
اتمنى لك كل الخير والسعادة والمحبة
ورحمة ومغفرة من رب الكون
وشفاعة من سيد البشر اجمعين
سيدنا محمد صلى الله عليةوسلم
وان شاء الله هكون اول المشاركين.
واطرح فكرة
لاصحاب ومشاركين مدونتك ومسابقة رمضان القائمين خارج مصر ولا يوجد لهم اي قريب او صديق مصري
ان يتبرعو بقيمة الجائزة لاعمال الخيرة,ان كان للفقراء,المحتاجين,المساكين,او لبناء واعمار مسجد او اي مؤسسة خيرية.
فشهر رمضان شهر الخير والبركات.
او ممكن الي ما يبغى اي شحن نجمع قيمة كل جائزة ونقوم بشراء وجبات افطار للمساكين والفقراء.
وهكذا بمسابقة جميلة تشد ع التواصل والارتباط والفرح ندخل السعادة ع اناس غلابة..
ورمضان كريم
حبيب الروح
السلام عليكم

مصطفى محمود said...

كل سنة وانت طيب يا كريم ....اية يا عم انت ناوى تشتغل ف الاعلانات ولا اية .. والله فكرة جميلة ... بس انت متاكد انة مش هيكون فى واسطة فى المسابقة دى ؟ معلش اصل الواحد اتعود بقى ههههههههه.. انا بقترح بتواجد مراقبين دوليين.هههههههه

تحياتى

kareem azmy said...

هاااى متوحد
متشكر على كلامك و يا رب المسابقة تنجح

==========
هاى احمد اللي عايش ف الزقازيق
شكرا لزيارتك

=========

هاى حبيب الروح
متشكر على كلامك الجميل قوي ده و كتير عليه والله
عموما افكارك جميلة بس هي المشكلة ان اللى انت بتقترحة ده عاوز ميزانية كبيرة و الجوايز بتاعتنا رمزية يعنى .. بس اوعدك لو حد تقدم و ساهم و شارك ف رعاية المسابقة هعمل اللى انت قولت عليه

============
الغالي مصطفى
تعليقك ضحكني قوي و الله عندك حق اتعودنا خلاص على الواسطة ف كل شىء ... بس متقلقش خالص اخوك كريم مش منهم يعنى مش محتاجين مراقبيين دولين و لا حاجه

تحياتي لكم
كريم

Room No 69 said...

هااي ازيك يا كريم
فعلا فعلا فكره جميله ومعتبره
وهي برده هتقرب المدونين من بعض وهتخلق بينهم روح المحبه والصداقات ممكن تقوى
ففيك الخير يا قمر
لكن فعلا مسألة الجايزه دي كنت بتتبع نهايتها معاك وانت بتحط كل شويه خيار من الخيارات
يااااااااعم كنت قلت حاجه تملى العين وتشبع النفس
كنت مستني انك تقول الجايزه هي
سهره ويا أحمد عز لوووول
ياااه لو الجايزه كانت احمد عز انا مش هتررد اني اشارك
بهزر يا قمر !!!

لكن مسالة كرت الموبايل جميلة , وانا مش شايف ان فيها مشكله للي خراج مصر
حيث ان اغلب الشركات الي زكرتهم هي عالميه
زي فودافون واتصالات الاماراتيه وغيرهم..
لكن كمان فكره معتبره وجميله على الاقل هنوفر كم قرش !!
مجرد سؤال هي الجايزه 500 جنيه للشخص ؟
او قيمة الجايزه للكل هي 500؟
اااه بدأت اطمع قووول كم كم ؟
متخلوها 1000
بلييييز لوووول!!!!

وووو كل سنه وانت بخير ورمضان كريم يا كريم ...

إيساف

Room No 69 said...

يا لهووووووي نسيت اغنيلك !!
وحاوي يا وحوي
ايووووحه وكمان وحوي عشان كريم
ايوووحا

بص الفناوس السنادي على حسااابك اااه مش تجيبلي من الي بيجبوهم من الصين
لا يعم عايز فانوس مصري ااه مش هتاكل بعقلي حلاوه
وعايز صنيه كنافه !!

ابقى عدي علينا نفطر زتون وجبنه رومي
سلام يا عسل

Unknown said...

بسم الله الرحمن الرحيم
عزيزي كريم
متأسف لاني اوصلت فكرتي بطريقة مش كتير واضحة..
بقصد انة اي فائز خارج مصر او مصري ومش عاوز الجائزة تقدر بحضرتك
تقوم بالتبرع بالقيمة وان كانت صغيرة لكل جهة معنية بعمل خيري..
(هو اكيد مش هنقدر حضرتنا نعمر مسجد,او نقيم مادوبة افطار)
ولكن فينا نضع قيمة امبلغ باي مكان لجمع التبرعات..
وبدا نحصل ع بركة وحسنات بشهر البركات..
حبيب الروح

kareem azmy said...

ايه يا ابني الطمع بتاعك ده
يعنى عاوز جايزة الف جنية و فانوس و صنية كنافة و فوقهم احمد عز
و ف الاخر هتفطرني زيتون و جبنة رومي
لا مش بس طماع لا بخيل كمان
هههههههههههههه
بهرج معاك

تحياتي
كريم عزمي

romeo said...

رمضان كريم عليك يا اكرم كريم
كل سنة والناس كلها طيبة يارب وبأحسن حال وفى منتهى الرضا والاستقرار
فكرة اكتر من رائعة ومنك انت كمان ياكريم متوقعة يعنى مش حاجة غريبة او جديدة عليك
ربنا يوفقك للخير
بس انا عندى اقتراح افضل انك ممكن تفكر فى كلام حبيب الروح وتحاول تعمل حاجة عشان المساكين هتبقى سعادتك بيها اكبر صدقنى
ربنا يكرمك ويوفقك للخير
لو تحب انا عندى اقتراحين تلاتة كدة مستنى تعليقك
romeo

kareem azmy said...

هاى روميو
اوكي اتفضل قول اقتراحاتك و لو انى عاوز اقول حاجه .. يعنى طبعا موضوع التبرع اكيد فيه ابواب كتير فقرا و مساكين و مستشفيات اماكن كتير طبعا ممكن الفلوس تروح لها .. بس احنا بنتكلم عن مسابقة هنا .. معتقدش انى لو هتبرع لحد او لمكان هنشر و اقول انى هتبرع و اكيد ناس كتير بتعمل كده من غير ما تقول و من غير متعرف حد .. قصدي من كلامي ان موضوع التبرعات موجود انما هنا احنا بنتكلم عن مسابقة .. لو حد عاوز يتبرع بالجايزة بقا هو حر .. و متهيالي مستشفي السرطان بتقبل تبرعات عن طريق رقم تتصل بيه و تفضل معاهم ع الخط و بيتخصم من رصيدك مقابل المكالمة و التكلفة بتاعة المكالمة بتروح لهم .. يعنى الفايز حر يعمل اللى هو عاوزة

تحياتي
كريم عزمي

noor-نور said...

يا خسارة
احنا ما عنا تليفونات زيكم . لا اتصالات ولا غيره
الموبايلات بتاعيتنا هي امريكية او اسرائيلية
بس رح اشارك ان شاء الله .
واذا اربحت راح اتبرع بالفلوس لليتامى والفقراء.
كريم فكرة رائعة واجرك عند الله كبيرررررررر
الله يوفقك
على فكرة انا مشتاق ازور كتير دول عربية بس امشكلة ممنوع .
ورمضان كريم علينا وعليكم

أحمــــــــدبــــــــــلال said...

بعد محاولات كثيرة لوضع تعليقى منذ عدة أيام اخيراً أحاول ان اعلق

بالطبع سوف أشارك فى تلك المسابقة
بالرغم من عدم تأكدى من متابعتها كلها لأسباب عديدة و اهمها عملى

ترى هل من الممكن تجميع الاجابات على عدة أيام مثلاً


و يا ترى ما هى نوعية الاسئلة ؟
أرجو ألا تكون متركزة على المثلية

على العموم
رمضان كريم

ضـوء الـقـمر said...

جيت اسلم واعتذر وانا مكسوفة جدا من التأخير اللي وصل لشبه انقطاع عن التعليق في مدونتك بس والله عندي مشكلة
في صفحات الكومنتس
اسفة جدا يا كريم

على فكرة الفكرة عجبتني جدا :)
كل سنه وانت طيب ورمضان كريم يا كريم

Anonymous said...

يؤيؤيؤيؤ بصراحة فكرة رهيبة كتير
جد ابداع
ماشاء الله حولك
الله يجزيك الف خير
تحياتي الك وللجميع وكل عام وانت بالف خير

Post a Comment

اشكرك على إهتمامك وتعليقك .. والإختلاف في وجهات النظر شئ مقبولة ما دام بشكل محترم ومتحضر .. واعلم أن تعليقك يعبر عنك وعن شخصيتك .. فكل إناء بما فيه ينضح .